المحاكمة الطلابية لاعضاء هيئة التدريس

المحاكمة الطلابية لاعضاء هيئة التدريس بكلية (E)  جامعة (M)  قسم (MPED)

الدعوة :

تقدم طلاب الفرقة (3) بكلية () برفع دعوة قضائية ضد اعضاء هيئة التدريس في القسم و قد وجهة نيابة الجامعة عدد من التهم :

1.   المسئولية التامة عن ضعف مستوي التعليم بالقسم و لذلك لان كل دكتور  مش عايز يشتغل في الجامعة الي الحكومة بتقول انها مجانية لانه بيشتغل في الجامعة الخاصة و بيقبض بالشوال .

2.      عدم الاهتمام بالسكاشن و المعيدين و انهم اساسا معرفوش المعيدين بيدرسوا ايه و بيشتغلوا ولا لأ.

3.      مجاملة ابناء اعضاء هيئة التدريس . مهو الي ابوة دكتور في الجامعة لازم هو كمان يبقي دكتور . عزبة واخدنها وراثة .

4.   عدم احترام ادمية الطالب بانه مثلا يدي ميعاد المحاضرة في الميعاد الي بيناسبة بمزاجه دون الرجوع لجدول ولا نيلة و كمان ممكن ميجيش المحاضرة و الطلبة تفضل مستنية الباشا ده غير انه لو جه بدري (اتاخر مثلا ساعتين ) بياخد غياب و يمنع دخول حد بعديه .

5.      بيصححوا الامتحانات بعد الامتحان ب 3 شهور بعد خراب مالطة يعني .

6.   تجارة الكتب الي هي اصعب من تجارة المخدرات . يعني مثلا الدكتور فلان مرة كان منزل كتابين واحد ب 45 و التاني ب 15 مثلا , قال الي هيشتري الكتاب له خصم 3 جنية ...

7.   الادعاء الكاذب من احد دكاترة الجامعة بان الطالب بيتكلف علي الدولة 35 الف جنية في السنة و ده كان في برنامج من 5 ال 6 بالقناه التانية المصرية  , طب حد يديني امارة واحد بكده . المدرجات  المكسرة و لا مئات الطلبة الي محشورين في مدرج الكثافة العددية في اكبر من علبة السلمون .

8.      ده غير انهم يفضلوا طول السنة يلغوا في محاضرات و يجي في اخر اسبوع يبتدي يدرس لك المنهج بقي .

9.      اتوجه بسؤال اخير لاعضاء هيئة التدريس . هل ضميرك(ان وجد) راضي عنك؟؟؟!!!؟؟؟

اطالب بتوقيع اقصي العقوبة علي من تتوفر فيهم هذه الصفات و شنقهم علي بوابة الكلية ليكونا عبرة لمن لا يعتبر.

علي الدفاع اضافة تعليق . و علي من يرفع رفع دعوة اخري اضافة تعليق ايضا .

ملحوظة :

1.      هناك من اساتذة الجامعة من نكن لهم احترام شديد و نطالب باعطائهم الجائزة التقديرية و هم قليلون.

2.   كتبت هذا المقال تعبيرا عن سخطي علي التعليم الجامعي و هو احدي و اهم اسباب التخلف التكنولوجي و فساد هذا المجتمع الجامعي ما هو الا نموذج مصغر لفساد اكبر .

3.      من يجد في نفسه هذه الصفات فليحاول تغييرها  بدلا من ان يشغل نفسه بكاتب الموضوع.

 

 

 

شارك و أضف تعليقك...

صوت للمشاركة